النهارده الجمعه كان يوم صعب جدًا على الوسط الفني، بعد ما اتوفى الفنان الكوميدي الكبير سليمان عيد بشكل مفاجئ الصبح. الجنازه اتعملت في الشيخ زايد بعد صلاة الجمعه، وكانت مليانه مشاهد حزينه ودموع من كل اللي حبوه، سواء من الجمهور أو زمايله الفنانين.

اللي حضروا كانوا كتير، من أول كريم محمود عبدالعزيز اللي كان متأثر جدًا، لحد صلاح عبدالله اللي ماقدرش يمنع دموعه، وأحمد السقا اللي بان عليه الحزن، وكمان حضر أشرف عبدالباقي، إيهاب فهمي، شيماء سيف وجوزها، أشرف زكي، وغيرهم كتير من الفنانين.

واحده من أكتر اللحظات اللي وجعت قلوب الناس كانت لما مراته كانت بتعيط بصوت عالي وبتقول “الخشبه كانت بتجري الكل كان بيعيّط ويدعيله”، وكان واضح قد إيه الكل بيحب سليمان بجد.

سليمان اتولد سنة 1961 في حي الكيت كات، وكان خريج تجارة، لكن حب المسرح خلاه يسيب كل حاجة ويتجه للفن، وفعلاً قدر يرسم البسمه على وشوشنا سنين طويله. ربنا يرحمه ويغفرله.