كشفت تقارير صحفيه اسبانيه ان مشاركة لاعب برشلونة أليخاندرو بالدي في مواجهة إنتر ميلان بدوري أبطال اوروبا لسه مش مؤكده، وبتعتمد على حاجه وحده بس وهي الموافقه الطبيه النهائيه.

بالدي اتعرض لإصابه في مباراة ليجانيس الأخيره، ومقدرش يكمل اللقاء، ولما اتعملت له فحوصات طلع عنده إصابه في الجزء البعيد من عضلة الفخذ الخلفيه في رجله الشمال، والنادي أعلن وقتها إن رجوعه هيكون حسب سرعة تعافيه.

وحسب جريدة “آس”، ففرصته في المشاركه قدام ريال مدريد في نهائي الكأس يوم 26 أبريل شبه معدومه، لكن في أمل بسيط إنه يلحق ذهاب نصف نهائي دوري الأبطال ضد إنتر.

المشكله الكبيره إن إصابته دي في نفس المكان اللي اتصاب فيه قبل كده، بس وقتها كانت في رجله اليمين وخضع لعمليه وخد وقت طويل للتعافي، وده مسبب قلق للجهاز الطبي.

عشان كده، بالنسبه لبرشلونة، بالدي مش هيلعب إلا لما يكون في تأكيد طبي تام إنه جاهز، من غير ما يخاطروا بمستقبله.