اتوفى الفنان المحبوب سليمان عيد فـ الساعات الأولى من صباح الجمعه، بعد ما جاله تعب مفاجيء ووقفت عضلة قلبه قبل ما يوصل المستشفى، خبر وفاته صدم ناس كتير من الوسط الفني والجمهور.

النجم محمد عادل إمام نعى صاحبه سليمان بكلمات من القلب، ونشر صورته وكتب: “مش عارف أتكلم عنك أقول إيه ده إحنا اللي بينا كتير جدًا الله يرحمك يا صاحبي ويصبَّر أهلك ويصبَّرنا على فراقك.. هتوحشني أوي يا سليمان”.

جنازة الراحل اتعملت بعد صلاة الجمعه فـ المسجد الكبير بالمجمع الاسلامي بالشيخ زايد، ودفنوه في مقابر وادي الراحه بطريق الواحات، زي ما أعلن ابنه عالفيسبوك.

سليمان عيد اتولد سنة 1968، وبدأ مشواره في آخر التمانينات، بس انطلاقته كانت بفيلم “الارهاب والكباب”، ومن بعدها قدم أكتر من 150 عمل بين مسلسلات وأفلام ومسرح.

من أشهر أعماله “همام في أمستردام”، “النوم في العسل”، و”طيور الظلام”.

وكان آخر أعماله السينمائية فيلم “فار بـ7 ترواح” اللي لسه بيتعرض فـ السينما وشاركه فيه عدد كبير من النجوم.