الفنان طه دسوقي عبر عن غضبه بسبب الصحافه وبعض صفحات السوشيال ميديا اللي بقت بتتابع تفاصيل حياة الفنانين الشخصية وبتعاملهم كأنهم محتوى في حد ذاتهم، مش بس شغلهم.

كتب طه عـ الفيسبوك بوست وقال: “من امتى بقى الفنان نفسه كمخلوق بشري بقى هو المحتوى؟ ليه كل حاجه بيعملها تتصور وتتنشر؟ فرح، جنازه، عزا، حتى لحظات الانهيار في الدفن!”.

وكمل كلامه: “يعني ايه الخبرية فـ فيديو لفنان قاعد بياكل مع مراته، أو بيحضر فرح صاحبه؟ ولا فيديو لجثمان؟ ايه اللي بيحصل؟!”.

وقال كمان: “الصحفي الحقيقي ميبقاش كده، وده بيخليني اسأل، لو أنا قاعد في مطعم مع مراتي وجالي حد صورني، ده صحفي ولا متحرش؟ طب ليه لما اللي بيتصور يبقى فنان يبقى لازم يبتسم ويعمل باي؟”.

واختتم كلامه بطلب من الصحفيين والإعلاميين إنهم يفرقوا بين الحياة الخاصة للفنان، وبين شغله الفني، لأن الفنان مش آلة محتوى شغالة طول الوقت.

يُذكر إن طه بيشارك دلوقتي فـ فيلم “سيكو سيكو” اللي بيتعرض في السينمات.