مع اقتراب الموسم من نهايته، وكتير من البطولات الأوروبية خلاص اتحددت، بدأت الأندية الكبيرة تتحرك من دلوقتي عشان تحضّر لسوق الانتقالات الصيفي والمرة دي التركيز جاي على مركز قلب الدفاع، واللي واضح إنه هيشهد تحركات تقيلة.

برشلونة، اللي بيحاول يثبت تشكيلته ويحافظ على أغلب لاعيبه، ممكن يفتح الباب لرحيل حد من مدافعينه، خصوصًا مع الزحمة الكبيرة اللي بقت موجودة في الخط الخلفي.

الاسم اللي الكل بيتكلم عنه دلوقتي هو الأوروغوياني رونالد أراوخو، واللي مكانه الأساسي بقى مهزوز جدًا، رغم إن المدرب هانز فليك بيديله شوية دقائق كل ماتش، بس واضح إن مكانه مش مضمون زي الأول.

ورغم إن أراوخو كان جدد عقده قريب، ورفض أكتر من عرض مغري، إلا إن قعدته على الدكة في الماتشات الكبيرة ممكن تخليه يعيد حساباته من تاني.

اللي بيخلي القصة سخنة أكتر، هو إن عقده الجديد فيه بند بيخليه يقدر يمشي من 1 لـ 15 يوليو مقابل 65 مليون يورو وده رقم كبير، بس مش مستحيل على فرق عايزة تدعم دفاعها بقوة، ومن غير ما تدخل في مفاوضات طويلة مع برشلونة.

وهنا بيظهر اسم بايرن ميونخ، واللي ناوي يعيد ترتيب أوراقه في الدفاع، خاصة بعد أداء كيم مين-جاي اللي ماكانش على قد التوقعات وفعليًا، فيه كلام عن اهتمام أندية زي يوفنتوس وتشيلسي ونيوكاسل بكيم، واللي لو مشي، هيبقى فيه تمويل لصفقة زي أراوخو.

الصحف الكتالونية كمان قالت إن فيه خيارات تانية على رادار البايرن، زي جوناثان تاه وهويسين، لكن أراوخو هو اللي باين عليه المرشح الأقوى للانضمام.

في النهاية، القرار كله في إيد أراوخو يا إما يقرر يكمل في برشلونة وينافس على مكانه، يا إما ياخد خطوة جديدة ويبدأ مغامرة في الدوري الألماني… وساعتها البند الجزائي هيكون مفتاح الرحيل.

هل نشوفه بالتيشيرت الأحمر في ميونخ؟ ولا يقرر يقاتل عشان مكانه في كامب نو؟ الأيام الجاية هتقول.