وجهت الفنانة جومانا مراد نصيحة للسيدات علشان يحسوا بجمالهم الداخلي والخارجي، وقالت خلال لقائها في برنامج “كلام نواعم”: “كل ست لازم تبص لنفسها في المراية وتقول أنا أحلى ست في العالم، أنا بشوف نفسي إني بجنن”.

وأضافت جومانا إنها بتشجع الستات إنهم يسمعوا كلام حلو عن نفسهم بدل ما يبصوا فقط على عيوبهم.

وقالت جومانا: “الستات بتحب تسمع كلام حلو، ليه متسمعيش نفسك كلام حلو؟ إحنا دايمًا بننتقد نفسنا وما بنشوفش غير العيوب، لكن أنا ببص في المراية وأقول لنفسي أنا حلوة حتى لو عندي عيوب، دي ميزة مش عيب”.

وعن فكرة التقدم في السن، أكدت جومانا مراد: “كل ما بيكبر سني كل ما بحس إني أحلى وأعرف نفسي أكتر، السن مش هو المعيار للجمال، السن هو خبرة الحياة وشخصيتك اللي اتكونت مع الوقت”.

وأشارت جومانا كمان إنها بقت أكتر حنان على نفسها، وقالت: “زمان مكنتش بعرف أطبطب على نفسي، لكن دلوقتي اكتشفت إن كل ست محتاجة تكون حنونة مع نفسها وتكافئها”.

يذكر أن جومانا مراد شاركت في رمضان 2025 في المسلسل الخليجي “أم 44”.