يبدو إن قصة تشابي ألونسو مع ريال مدريد قربت تبدأ من جديد، بس المرة دي مش كلاعب، لا كمدرب أول للفريق الملكي شبكة “ريليفو” الإسبانية كشفت إن التواصل بين ألونسو والمدير العام لريال مدريد خوسيه أنخيل سانشيز ما انقطعش، بالعكس، مستمر وبشكل سلس جدًا، وكأن الأمور ماشية في اتجاه واضح ومحدد.

التقارير قالت إن إدارة ريال مدريد بلّغت تشابي بوضوح إنهم ناويين يسلموه الفريق بداية من فترة التحضير لموسم 2025/2026، وده معناه إن ألونسو خلاص دخل في حسابات الريال بشكل رسمي لكن قبل ما يستلم، سانتياغو سولاري حيكون هو المدرب المؤقت اللي هيقود الفريق في بطولة كأس العالم للأندية اللي جاية.

الخطوة دي جت بعد سلسلة من النتائج السيئة لريال مدريد، بداية من الخروج من دوري أبطال أوروبا، وبعدها خسارة كأس الملك، وكمان التراجع الواضح في سباق الليغا. كل ده خلى الإدارة تاخد قرار بإنهاء العلاقة مع أنشيلوتي بنهاية الموسم الحالي، رغم كل الإنجازات اللي عملها مع الفريق في فترته التانية.

ألونسو اللي مكسر الدنيا مع باير ليفركوزن، قدر يثبت نفسه كمدرب كبير ومحنّك، وده خلى الريال يشوف فيه الخليفة المثالي لأنشيلوتي، خصوصًا إنه ابن النادي وعارف كل صغيرة وكبيرة عن أجواء سانتياغو برنابيو.

دلوقتي الكل مستني بداية الحقبة الجديدة مع تشابي، وسؤال واحد شاغل الجماهير: هل يقدر ألونسو يكتب فصل جديد من المجد مع الميرينغي كمدرب؟