عقد أرني سلوت، مدرب فريق ليفربول، مؤتمر صحفي مهم قبل مباراه ليستر سيتي الجايه في الدوري الانجليزي، واتكلم فيه عن كذا حاجه، منها فرص الفوز بالدوري، وتجديد عقد فان دايك، ووضع ترينت ارنولد.

سلوت قال بصراحه إنه مش بيفكر في لقب الدوري دلوقتي، وقال: “أنا كل تفكيري دلوقتي في فريقنا ومباراة ليستر، مش في اللقب”.

ليفربول محتاج ٦ نقط بس علشان يحسم الدوري بشكل رسمي.

وعن تجديد عقد فيرجيل فان دايك، قال سلوت: “فيرجل لاعب مهم بالنسبالنا جدا، وشخصيته قويه ومؤثره، وبيقدر يلعب الكوره من ورا وبيوزع كويس، واحنا عايزين نحتفظ بأفضل لعيبتنا”.

كمان اتكلم عن ترينت أرنولد اللي بيرتبط اسمه بريال مدريد وقال: “مش هتكلم عن العقود اللي لسه ماتحسمتش، بس ترينت ملتزم ورجع من الإصابه واشتغل كويس جدا مع الفريق”.

وأضاف: “ترينت مش جاهز يبدأ قدام ليستر، لكن لو اتدرب النهارده وبكره طبيعي ممكن نشوفه عالدكه”.

الجمهور مستني المباراه دي بفارغ الصبر، خصوصا إن الفوز يقرب ليفربول أكتر من لقبهم العشرين.