ريال مدريد حسم تقريبًا هوية المدرب الجديد اللي هيقود الفريق بدل الإيطالي كارلو أنشيلوتي، واللي بنسبة كبيرة هيغادر مع نهاية الموسم.

بعد تكهنات وتداول أسماء كتير، التقارير الأخيرة من صحيفة “آس” الإسبانية أكدت إن تشابي ألونسو، مدرب باير ليفركوزن، هو الأقرب لتولي المهمة.

تشابي، اللي عامل موسم أسطوري مع ليفركوزن، وبقى حديث أوروبا، دخل في مفاوضات متقدمة مع إدارة الملكي، واللي شايفين فيه المدرب المثالي لمستقبل الفريق، لأنه بيجمع بين شخصية النادي الكلاسيكية وأفكار حديثة في التدريب.

ريال مدريد عانى مؤخرًا من هزيمة صعبة أمام أرسنال في دوري الأبطال، وده زاد من الضغوط على أنشيلوتي، رغم إنه لسه بينافس على لقب الليجا وكأس الملك قدام برشلونة.

المتوقع إن تشابي يمسك الفريق بعد نهاية كأس العالم للأندية في يونيو، علشان يبدأ فترة الإعداد للموسم الجديد.

إدارة ليفركوزن عارفة بالمفاوضات، والدفة دلوقتي في إيد ألونسو علشان يحدد مصيره.

الأنظار كلها دلوقتي على إعلان رسمي ممكن يحصل بعد نهائي الكأس، والجماهير مترقبة بداية عهد جديد مع أحد أساطير النادي.