واضح إن عثمان ديمبيلي قرر ياخد باريس سان جيرمان على كتافه الموسم ده! النجم الفرنسي واصل عروضه الجامده وسجّل هدف الفوز الوحيد قدام أرسنال، في ذهاب نصف نهائي دوري أبطال أوروبا، وخلّى الفريق الباريسي يخرج من لندن بغنيمة تقيلة.

الهدف ده مش بس مهم علشان نتيحة الماتش، ده كمان خلى رصيد ديمبيلي يوصل لـ33 هدف و12 أسيست في 45 ماتش مع باريس، يعني تقريبا بيشارك بهدف في كل لقاء! أرقام تقولك إن الراجل مش بس جناح سريع، ده ماكينة حسم بكل ما تحمله الكلمة.

ديمبيلي مع لويس إنريكي بقى لاعب ناضج أكتر، وبنشوفه بيشتغل دفاع وهجوم، وبيتواجد في كل مكان على الجبهة، وده خلى دوره محوري جدًا في مشوار الفريق في البطولة.

الجماهير الباريسية دلوقتي بتحلم باللقب الأوروبي اللي طول عمره مستعصي عليهم، ولو فضل ديمبيلي بنفس الفورمة، مافيش حاجة تمنعهم من كسر العقدة أخيرًا.

فهل يكملها ديمبيلي في الإياب ويخطف بطاقة النهائي؟ الأيام الجاية هتقول!