الصحيفة الإسبانية “ريليفو” فجّرت خبر ممكن يغيّر شكل دكة بدلاء ريال مدريد في الفترة الجاية، لما كشفت إن تشابي ألونسو تواصل مع إدارة النادي من حوالي شهر تقريبًا، وسألهم بشكل مباشر عن مستقبل الجهاز الفني، خصوصًا مع الكلام الكتير عن تجديد عقده مع باير ليفركوزن بعد النجاحات الكبيرة اللي عملها معاهم.

الرد من إدارة الريال ماكانش حاسم، طلبوا من ألونسو يصبر شوية، وقالوا له إنهم محتاجين وقت عشان يقيّموا وضع الفريق مع أنشيلوتي، والموضوع كله مرتبط بنتايج الفريق في البطولات اللي بيلعب فيها، سواء الكأس أو دوري الأبطال أو حتى الليغا.

بس الصراحة، الرد ده خلّى تشابي يحس بحالة من التردد والقلق، رغم إن فيه ناس مقربين منه في فالديبيباس طمنوه وقالوله إن اسمه مازال على رأس قايمة المرشحين لو حصل تغيير في الجهاز الفني ومع كده، ألونسو مش مرتاح تمامًا، وده بسبب التصريحات العلنية اللي بيطلع بيها الرئيس فلورنتينو بيريز كل شوية، واللي دايمًا بيأكد فيها على ثقته في أنشيلوتي، وبيشيد بإدارته لغرفة الملابس داخل الفريق.

الوضع حالياً غامض شوية، بس اسم تشابي ألونسو راجع بقوة في كواليس الريال، خصوصًا مع اقتراب نهاية الموسم، وكل الأنظار متوجهة للنتايج اللي هيحققها أنشيلوتي في الأسابيع الجاية، لإنها هتكون العامل الحاسم في تحديد مستقبل الجهاز الفني.

السؤال اللي بيطرح نفسه: هل تشابي هيرجع مدريد كمدرب قريب؟ ولا هيفضل يصنع التاريخ في ألمانيا؟