في لحظه صادمه وحزينه، صحينا النهارده الجمعه على خبر وفاة الفنان الكوميدى المحبوب سليمان عيد، اللي مات فجأه بسبب سكته قلبيه من غير ما يكون عنده أي مشاكل صحيه قبلها، حسب كلام أسرته.

سليمان كان عايش يومه عادي جدًا وسط عيلته، بيضحك وبيهزر وبيتكلم مع صحابه، واتكلم مع الفنان شيكو كمان قبل وفاته بساعات قليله، وده خلا الناس مصدومه أكتر من الرحيل المفاجئ.

ابنه أعلن الخبر من خلال بوست على الفيسبوك قال فيه “أبويا في ذمة الله”، وقال إن صلاة الجنازه هتكون بعد صلاة الجمعه في المسجد الكبير بالمجمع الإسلامي في الشيخ زايد.

سليمان عيد اتولد يوم 17 أكتوبر 1961، وبدأ مشواره الفني في آخر التمانينات، بس انطلاقته الحقيقيه كانت في فيلم “الإرهاب والكباب” سنة 1992 مع عادل إمام، ومن بعدها مشواره اتفتح وشارك في أكتر من 150 عمل متنوع بين سينما وتلفزيون ومسرح.

كان دايمًا بيقدم أدوار بسيطه وكوميديا قريبه من القلب، والناس حبّته من غير ما يبالغ أو يتصنع، ربنا يرحمك يا سليمان ويدخلك فسيح جناته.