كشفت تقارير صحفيه إسبانيه صباح اليوم التلات، إن المهاجم الأرجنتيني جوليان ألفاريز بدأ يشك فـ مستقبله مع فريق أتلتيكو مدريد، رغم تألقه اللافت معاهم من بداية الموسم.

ألفاريز اللي انضم لأتلتيكو الصيف اللي فات، جاي من مانشستر سيتي الإنجليزي بصفقه ضخمه وصلت ٧٥ مليون يورو، كان الكل متفائل بيه، وفعلاً اللاعب قدم مستوى قوي جدًا، مسجل ٢٦ هدف ومقدم ٥ تمريرات حاسمه فـ ٤٩ مباراه بس!

لكن على الرغم من أرقامه الممتازه، صحيفة “إل ناسيونال” الإسبانية أكدت إن ألفاريز حاسس بخيبة أمل كبيره بسبب نتائج الفريق، وإنه بدأ يفكر بجدية فـ الخروج من النادي.

عقد ألفاريز مع أتلتيكو ممتد لحد ٢٠٣٠، وده بيصعّب من مهمة أي نادي يفكر يضمه الصيف الجاي، خصوصًا إن إدارة النادي مش هتسيبه يمشي بالساهل.

جمهور الأتلتي مستغرب من الأخبار دي، خاصة إن اللاعب محبوب جدًا وبيقدم كل اللي عنده، لكن يبدو إن الأوضاع داخل الفريق مأثّره على نفسيته، وده اللي خلى مستقبله فجأه يتحول لسؤال كبير!