صباحك أوروبي النهارده جاب حاجات كتير من كبرى الصحف الأوروبيه، ما بين أخبار انتقالات، وتجديدات، وقرارات مدربين.

أرني سلوت مدرب ليفربول لسه مش قادر يوضح موقف أرنولد، واللاعب عايز يروح ريال مدريد ببلاش، عقده هينتهي مع نهايه الموسم والمدرب قال مفيش جديد لحد دلوقتي

في مانشستر يونايتد، الفريق عنده أسوأ موسم تهديفي من سنين، سجل بس 38 هدف، وبيفكر يجيب المهاجم سيسكو من لايبزيج، وكمان بيراقب ليام ديلاب من إيبسويتش تاون.

اما توماس بارتي، مستقبله مع آرسنال مش واضح، وعقده قرّب يخلص، وأرتيتا بيقول فيه تقدم بس سايب الموضوع للمدير الرياضي.

وفي إيطاليا، إنتر بيحاول يحتفظ بمدربه إنزاجي، بعد عرض الهلال اللي وصل لـ20 مليون يورو، والمدرب بياخد 6 5 مليون بس دلوقتي.

وفي مدريد، أنشيلوتي متمسك بمكانه رغم الإقصاء من الأبطال، وتشابي ألونسو هو الأقرب لو حصل تغيير.

هيكتور فورت لاعب برشلونة الصغير، لسه متمسك بحلمه رغم إنه شارك في 13 ماتش بس، منهم اتنين أساسي، ومدد عقده لحد 2029.

أما مبابي، فخد صدمه كبيره بعد ما نادِي كاين اللي امتلك 80% منه هبط للدرجه التالته.

تشيلسي كمان قرر يرجّع أندريه سانتوس بعد ما تألق مع ستراسبورج، علشان يشارك في كأس العالم للأنديه.