مارك كوسيكي، وكيل يورجن كلوب، مدرب ليفربول السابق، طلع ونفى كل الكلام اللي بيتقال اليومين دول عن إن كلوب عايز يرجع للتدريب، خصوصًا لو وصله عرض من ريال مدريد او منتخب البرازيل.

كلوب كان ساب ليفربول في نهاية الموسم اللي فات، وبعدها بكم شهر بقى مسؤول كبير في شركة ريد بول اللي بتمتلك كذا نادي في أوروبا، وابتدى شغله رسمي من يناير اللي فات.

في تقارير نزلت من أيام، قالت إن كلوب ممكن يفكر يرجع للتدريب لو جاله عرض من الريال أو البرازيل، لكن كوسيكي حسم الجدل وقال في تصريحاته لـ سكاي سبورتس النسخه الألمانيه كلوب مبسوط جدًا بدوره الجديد كرئيس لقطاع كره القدم في ريد بول، ومركز تمام في شغله

وختم كلامه وقال هو مرتاح وسعيد بالمكان اللي هو فيه دلوقتي

يُذكر إن في كلام كتير عن مستقبل أنشيلوتي مع ريال مدريد، وإن الاتحاد البرازيلي كمان بيدور على مدرب جديد بعد ما مشي دوريفال جونيور، بس لحد دلوقتي كلوب مش في الحسبه.