لبلبه تحتفل بشم النسيم بالفسيخ والبصل لوحدها في الجنينة
نشرت الفنانه لبلبه ڤيديو جديد على حسابها الرسمي علي إنستجرام، بتحتفل فيه بطريقتها الخاصه بشم النسيم، والڤيديو كان طريف وخفيف على قلب المتابعين.
ظهرت لبلبه وهي خارجه من بيتها شايله شنطه وفـ إيديها بصل اخضر، وركبت العربيه وراحت ع الجنينه وقعدت على الأرض وبدأت تطلع اللي في الشنطه وتجهز الفسيخ والليمون وتاكله مع العيش البلدي والبصل.
وقالت لبلبه في الڤيديو بصوت ضاحك: “يا فسيخ يا فسيخ يا فسيخ اليوم يومك يا فسيخ، كل سنه وأنا طيبه وانتوا طيبين”.
وكملت كلامها وقالت إنها كلمت صحابها يروحوا يحتفلوا مع بعض، بس هما رفضوا وقالوا: “إنتي فضيحه، لو جيتي الناس هتتلم علينا”، فقررت تروح لوحدها وتنبسط على طريقتها.
ظهرت بإطلاله كاجوال ببنطلون جينز وجاكيت أحمر بسيط. وكتبت: “احتفالي بشم النسيم مين محتفلش لسه !!!؟ قولولي احتفلتوا إزاي وفين؟”.
يُذكر إن لبلبه شاركت مؤخرًا في فيلم “آل شنب”، واللي كان في إطار عائلي كوميدي خفيف، وحقق ردود فعل حلوه من الجمهور.
