في مداخله مؤثره مع برنامج “الحكايه” مع عمرو أديب، كشف الفنان الكبير صلاح عبد الله سبب إنهياره في جنازة صديقه الفنان سليمان عيد، اللي رحل عن دنيانا فجأه يوم الجمعه 18 أبريل بعد أزمه قلبيه.

صلاح قال: “إنا لله وإنا إليه راجعون، المفاجأه كانت صعبه أوي عليا، ده أخ وصديق بقاله أكتر من 25 سنه، من أيام ما كان بيشتغل معايا في مسرحيات الجامعه”.

وأضاف: “آخر مره سمعت صوته من أسبوعين، ودي فتره كبيره بالنسبالي، بس وجعني شريط الذكريات، من أول أيامه وهو شاب عنده طموح وحضور قوي”.

وتكلم كمان عن موهبة سليمان عيد، وقال إنه كان دايمًا مطلوب في الأعمال الكوميديه علشان خفة دمه وبديهته، وكان بيعمل كراكترات مختلفه وناجحه، وشارك في حاجات كتير، حتى لو كانت صغيره بس كانت بتسيب بصمه.

الجنازه حضرها عدد كبير من النجوم اللي شاركوا في وداعه، زي أحمد السقا، طه دسوقي، محمد ثروت، كريم محمود عبد العزيز، أشرف زكي، إيهاب فهمي، وغيرهم.

سليمان عيد سيب إرث فني كبير وضحكه صعب تتنسى.. ربنا يرحمه.