في تقرير صباحك أوروبي الصحف الأوروبيه اتكلمت عن تطورات ناريه في الكوره أولهم داروين نونيز مهاجم ليفربول، اللي شكله قريب جداً من الرحيل في الصيف، بعد ما خرج من حسابات المدرب الجديد آرني سلوت، والنادي بيدوّر على مهاجم بداله، وسط عروض من أندية سعوديه.

بيب جوارديولا كمان قلقان، لأنه خايف السيتي ميصعدش لدوري أبطال أوروبا الموسم الجاي، رغم إن النادي ناوي يدخل صفقات قويه الصيف الجاي.

في تشيلسي، نيكولاس جاكسون قال إنه مرتاح وعايز يكمل مع البلوز، رغم كلام عن ضم مهاجم جديد.

اما برشلونة، فمصدوم بعد إصابة ليفاندوفسكي بتمزق في الركبه، وحيغيب 3 أسابيع، يعني مش هيلعب قدام مدريد في نهائي الكأس، ولا ضد إنتر في نص نهائي الأبطال وكمان النادي زعلان من جدول الليجا اللي شايفينه ظالمهم.

ريال مدريد خاض مرانه الأخير قبل ماتش بلباو، ومبابي وميندي لسه بيكملوا التأهيل ومن ناحيته، كونتي مدرب نابولي طلع بتصريحات ناريه وقال إنه مش هيفضل ساكت على الفوضى اللي في النادي.

اما بايرن ميونخ، فمكمل في صدارة البوندسليجا، بعد فوز كبير على هايدنهايم، واللاعيبه متحفزه للفوز باللقب.